মুখ্য পৃষ্ঠা
06/04/2515:32
"অভিশপ্ত আঘোণ"
© ৰাজু কলিতা
__________________
আঘোণী বাইৰ গাৱঁলৈ
এইবাৰো আঘোণ নাহিল |
সেউজীয়া পথাৰ খন গৰ্ভৱতী হোৱাৰ পৰত
ডিক্ৰঙে সুঁতি সলাইছিল
সেউজীয়া পথাৰ খনিৰ মাজেৰে |
কৃষকৰ সপোন সপোনহৈয়ে থাকিল
সোণালী ধাননিত বালিমাহি চৰাই জাকে
গীত গাবলৈ নাহিল |
বানপানীৰ বুৰঞ্জীত আঘোণী বাইৰ গাওঁ
কলংকিত কেইবাটিও বৰ্ষ |
আঘোণ অভিশপ্ত নেকী ?
কাতিৰ ছুটি দিনবোৰ
কঙালী হৈয়ে থাকিল |
আঘোণৰ ইতিহাসে আঘোণী বাইৰ গাওঁ খনিক
প্ৰতাৰণা কৰে |
প্ৰৱঞ্চনা সাৱতি চহা কৃষকে চকুলো টুকে |
সেউজীয়া ধাননীয়ে
হালধীয়া সোণগুটিৰ ভৰত মুৰ দোঁৱাবলৈ নৌ পাওঁতেই
নিজৰ অস্তিত্ব ডিক্ৰঙৰ বুকুত সমৰ্পন কৰে |
ভোগালীৰ ভোগ কাতিৰ দৰেই কঙাল হ'ব
মেজিৰ জুই ৰঙা হৈ নজ্বলিব |
হয়তো ৰংমনৰ দৰে কৃষকৰ দেহ
বেদনাত চিতা হৈ জ্বলিব |
লুইতৰ দৰে ডিক্ৰঙো ফেনে ফুটুকাৰে বাঢ়ে ,
বাঢ়ি আহে সেই একেই ঢ়ল কৃষকৰ দুচকুয়ে |
চকুলোৰ চেকুৰা আঘোণৰ কোমল ৰ'দত
দুগালত সোণৰ দৰে জিলিকে |
দূৰৈৰ কোনো গাৱঁৰ পৰা ,
দাৱনিৰ খিলখিল হাঁহি ভাহি আহে
আৰু আঘোণী বাইৰ গাঁৱে নীৰবে উচুপি |
হতাশাত জৰ্জৰিত হৈ
ডিক্ৰঙৰ কোবাল সোঁতক অভিশাপ দিয়ে |
ৰবাব টেঙা গছতে মৰহে |
● ৰাজু কলিতা
2014
